ثلاث صور تلخص اسباب هزيمة الاهلى امام باتشوكا المكسيكى

اكيد معظمنا اتصدم لما عرف ان الاهلى اتغلب فى الماتش النهارده من فريق باتشوكا المكسيكى وبنتيجة مذلة 2-4 او بمعنى تانى كتير مش مصدق ان الاهلى تتخطف منه المباراة كده بعد ما كانت فى ايده وبعد ما كان متقدم 2-0 انا نفسى ما كنتش مصدق وانا بتفرج على الماتش انا احنا اتغلبنا لكن بعد كده عرفت ان ده الطبيعى الاهلى ام يلعب فلم يفز

لكن اسباب الهزيمة متلخصة فى 3 نقط او بمعنى تانى 3 لقطات اسمحولى اعرضها على حضراتكم


(1)






اللقطة الاولى كانت فى بداية الشوط الاول لما محمد بركات استلم كرة بينية وانطلق بيها محرزا الهدف الثالث للاهلى لكن الحكم الاوزبكى ادهش الجميع لما لغى الهدف بداعى التسلل واكيد الصورة موضحة انه ماكنش تسلل واكيد الهدف ده كان كفيل انه يقضى على امال فريق باتشوكا




(2)



اللقطة التانية كانت فى هدف التعادل الثانى لباتشوكا من خطأ قاتل لامير عبد الحميد اللى باين انه مش نفع الا لحراسة مرمى جمهورية شبين وان مستواه لا يرقى لحراسة عرين النادى الاهلى واللى لسه بيعانى من رحيل عصام الحضرى لمركز شباب سيون
انا ما خففش عليا صدمة الهزيمة الا كمية الضحك اللى ضحكتها على امير فى هذه اللقطة لان أ-ب حراسة مرمى ان الحيطة تقف تسد الزاوية اللى قدام الكورة مباشرة وحارس المرمى يقف فى الزاوية التانية لكن بسلامته وقف وباعلى صوت ويقول شمال شمال وكمان راح واقف ورا الحيطة وبعد ما لاحظ شادى الخطأ قاله شادى الكورة اهيه وبيشاور على الكورة قام بسلامته قاله طيب خلاص خلاص وكمان اتاخر فى الخروج على الكورة بعد ما اتلعبت





(3 )




اللقطة التالتة كانت فى الجهاز الفنى للأهلى وهو جالس على الدكة وحسام البدرى بيتاوب والنتيجة 2-2 بينما المدير الفنى لباتشوكا لم يجلس طوال المباراة وظل يلقى التعليمات وبان طبعا قرايته للماتش بين الشوطين فى حين ان جوزيه كان خارج نطاق الخدمة تماما وظهرت عدم قرايته للماتش صح وده كان باين فى تغييراته الغبية اللى حفظناها تماما

نفسى اعرف ازااى يطلع احمد حسن عشان عمل واحد ولا اتنين باصة غلط فى حين انه كان قافل نص الملعب تماما

كمان ازاى احمد فتحى يطلع ويسيب بركات وحسام عاشور وبعدين هو خلاص لازم سيد معوض ينزل كل ماتش وازاى ينزل حسين ياسر الى مفروض انه صانع لعب ولازم يمسك الكورة والكورة اصلا ما وصلتش لاعبى الاهلى نتيجة لوجود حسام عاشور وحيدا فى نص الملعب وفين هانى العجيزى و معتز اينو وحسين على و بقية الصفقات اللى كلفت الاهلى مبالغ فى حين ان جوزيه يصر على اشتراك 13 او 14 لاعب فقط




يا ريت تقولوا ايه رايكوا فى الموضوع